Миңнеханов: Авыл хуҗалыгында хезмәт хакы түбән булу яшьләрне җәлеп итәргә мөмкинлек бирми

Скопировать ссылку

Татарстан Республикасы җитәкчесе Рөстәм Миңнеханов сүзләренчә, авыл хуҗалыгы тармагында хезмәт хаклары түбән булу сәбәпле, яшьләр бу өлкәне сайламый.

«Хезмәт хакы түбән булу яшьләрне җәлеп итәргә мөмкинлек бирми. Авыл хуҗалыгы хезмәткәрләре арасында яшьләр 10 проценттан да кимрәк. Былтыр авылда 61 белгеч калган, ә без ел саен 2000 белгеч әзерлибез. Министрлыкка яшь белгечләрне җәлеп итү чараларын уйларга кирәк», – диде ул.

Авыл хуҗалыгы һәм азык-төлек министры Марат Җәббаров сүзләренчә, авыл хуҗалыгы тармагы 79-96 процентка кадрлар белән тәэмин ителгән. Зоотехник, агроном һәм ветеринария табибларына ихтыяҗ зур, ди ул.

Министр әйтүенчә, былтыр, студентларны укыту һәм практика үткәрү буенча чыгымнарны каплар өчен, авыл хуҗалыгы предприятиеләренә 12,7 миллион сумлык субсидия бирелгән. Программада 107 предприятие һәм 400 студент катнашкан. Бу ярдәм чарасы быел да сакланган.

Министр яшь белгечләргә бирелә торган түләүләр турында искәртте. Югары уку йортларын тәмамлаучылар өчен 300 мең сум һәм урта махсус уку йортларын тәмамлаучылар өчен 150 мең сум күләмендә бер тапкыр бирелә торган түләүләр каралган. Булачак белгечләргә шулай ук ел дәвамында ай саен 7,5 мең сум өстәмә түләү була.

«Узган елда яшь белгечләргә ярдәмнең гомуми күләме 21 миллион сум булды", — дип билгеләп үтте Җаббаров.

Сәхифәләр

Миңнеханов: Авыл хуҗалыгында хезмәт хакы түбән булу яшьләрне җәлеп итәргә мөмкинлек бирми