news_header_top_970_100
news_header_bot_970_100

«Мин матурлык эзләп йөрим...» автомарафонының чираттагы концерты Теләчедә узачак

21 июльдә Актанышка кузгалалар, 24 июльдә Лениногорскига юл тоталар.

«Мин матурлык эзләп йөрим...» автомарафонының чираттагы концерты Теләчедә узачак
Рамил Гали

«Китап» радиосының «Мин матурлык эзләп йөрим...» автомарафонының чираттагы концерты 16 июльдә Теләче районы Баландыш авылында төзелгән зур паркта узачак.

Бу хакта бүген «Татмедиа» агентлыгында автомарафонга багышланган матбугат конференциясендә билгеле булды.

«Китап» радиосының башкарма продюсеры Лилия Кадыйрова әйтүенчә, 21 июльдә Актанышка кузгалалар, 24 июльдә Лениногорскига юл тоталар. «Бу иң күп тавыш җыйган районнар. Анда безне көтәләр, димәк, шунда барабыз. Тавышлар саны буенча беренче урында Сарман, ләкин аны ахыргарак күчердек. Алай бик көткәч, Сарманга көчлерәк итеп әзерләнеп барырга исәплибез», - диде ул.

Лилия Кадыйрова алдагы концертларда шигырьләр санын арттырачакларын әйтте. «Шигырь сөйләүне без башта ничектер программадан аерылып торыр, халык җырларга, биергә килә, шигырьләр бик үтмәс дип уйлаган идек, ләкин хәзерге заманча аранжировкалы җырлардан соң, баянга шигырь сөйләү, җыр җырлау бик матур чыкты. Алдагы концертларда шигырьләрнең күләмен 100 процент арттырачакбыз, - диде.

«Китап» радиосының баш мөхәррире Алмаз Миргаязов концерт узачак районнар радионың социаль челтәрләрендә махсус тавыш бирү нәтиҗәләре буенча билгеләнүен әйтте.

«Безне күрергә теләгән һәркем шул аккаунтларга кереп, үз авыллары, район, шәһәрләре өчен тавыш бирә ала. «Кая чакыралар, шунда барабыз дигән принцип буенча эшләп карарга булдык. Башта бер исемлек төзегән идек, ләкин ул бик уңышлы булып чыкмады, җирлекләрдә берникадәр сүлпәнлек сиздек, шуңа проектны урыннардан инициативаларга нигезләнеп уздырырга булдык», - диде Миргаязов.

news_right_column_1_240_400
news_right_column_2_240_400
news_bot_970_100