Авыл 10 сентябрь 2016 16:45

Мин җирсез яши алмыйм - Самара фермеры Асия Шәйхетдинова

Инде өч оныгы булган ханым авыл хуҗалыгы өлкәсендә озак еллар нәтиҗәле эшләп килә.

Скопировать ссылку

(Самара, 10 сентябрь, "Татар-информ", Нурсинә Хәкимова). Самара өлкәсе Похвистнево районының Яңа Мансур авылында яшәүче Асия Шәйхетдинова крестьян-фермер хуҗалыгы җитәкчесе булып эшли. "Бердәмлек" газетасы җитәкче фермер хатын-кыз хакында яза.

"Колхозда хисапчы, склад җитәкчесе булып эшләгән Асия, күмәк хуҗалык таркалгач, эшсез кала. Тик ул төшенкелеккә озак бирелми, тормыш иптәше Рафаэль белән киңәшәләр дә, игенчелек белән шөгыльләнергә кирәк дигән карарга киләләр. Шәйхетдиновлар җиң сызганып эшкә керешкәндә, халыктан арендага алынган җирләрнең һәр карышын файдага кулланырга тырышалар. Уллары Рәфис белән кызлары Зөлфияне дә тырыш, хезмәт сөючән итеп тәрбиялиләр. Уңган, тату бу гаиләне авылда да хөрмәт итәләр, кирәк чакта ярдәм кулы сузалар", - дип яза газета.

"Ирем вакытсыз бакыйлыкка күчкәч тә авылдашларым, туганнарым ярдәмгә килде, барысына да зур рәхмәт. Крестьян хуҗалыгыбыз белән ялгызыма җитәкчелек итәргә авыр булса да, бу шөгыльне ташламаска булдым. Чөнки мин авыл баласы, җирдә эшләргә яратам һәм ансыз яши дә алмыйм. Ул вакытта инде үз гаиләләре белән яшәүче балаларым да минем теләкне хупладылар, — дип сөйли Асия ханым. — Рафаэль, иртә үләсен алдан ук сизенгәндәй, бөтен техниканы да яңартып куйган иде. Ул яктан авырлыклар килеп чыкмады. Ә менә эшче куллар җитешмәгәнлектән, кеше ялларга туры килде. Аларга хезмәт хакын вакытында түләп барырга тырышам. Җир пайлары хуҗаларын он, карабодай, икмәк, көнбагыш мае белән тәэмин итеп торам, җир салымнарын да түлим. Кредитка чумып яшәгән авыл кешеләренә бу зур файда, минемчә.

Ә шәхси тормышыма килгәндә, бүген мин бик бәхетле, чөнки балаларым, “әби” дип өзелеп торучы өч оныгым бар, хатын-кыз өчен шуннан да әһәмиятлерәк нәрсә юк. Алар — минем дәвамым, шатлыгым, юанычым".

Асия Сәетгали кызы авыру каенанасы Әминә әбине дә тәрбияли, хәйриячелек белән шөгыльләнергә дә өлгерә. Авылда үткәрелгән Сабан туйларының аның катнашыннан башка үткәне юк.

"Бу бәйрәмнәр иң элек авылыбызны яшәтүдә, ата-бабаларыбызның гореф-гадәтләрен, матур традицияләрен саклап калуда зур урын алып тора, шуңа да моңа үз өлешемне кертүне изге бурычым дип саныйм", — дип сөйли Асия Шәйхетдинова.

#Самара татарлары #Яңа Мансур #"Бердәмлек"

Сәхифәләр

Мин җирсез яши алмыйм - Самара фермеры Асия Шәйхетдинова