Милли музейда Халыкара хатын-кызлар көнендә кунаклар өчен күңел ачу программасы була
Татарстан Милли музее 8 март - Халыкара хатын-кызлар көнендә 12:00 – 16:30 сәгатьтә кунакларны программада катнашырга чакыра.
«12:00-14:00 сәгатьтә «Үткәннән кайтаваз» иммерсив программасы көтелә. ТР Милли музее экспозициясе буенча квестка чакырабыз. Төрки күчмә халыкларның иксез-чиксез далалар турында сөйләве, Сөембикә патшабикә һәм Екатерина II белән танышу - болар барысы да интерактив программага кертелгән. Квест дәвамында Татарстан Республикасы Милли музееннан кыйммәтле бүләкләр алырга мөмкин», - дип хәбәр итә музейның матбугат хезмәте.
12:00-15:00 сәгатьтә киемнәргә төрле рәсемнәр ясау буенча остаханә була. Моның өчен үзегез белән рәсем ясау өчен кием алып килү сорала. 13:30-14:30 сәгатьтә матур бизәнү серләренә төшенү - макияж ясау буенча мастер-класс оештырыла. Стилисттан үзегезнең уникаль стилегезне булдыру турында киңәшләр ишетә алачаксыз.
15:00-16:00 сәгатьтә хатын-кызлар өчен йога була. Тәҗрибәле инструкторлар мастер-класслар үткәрәчәк. Сез көндәлек тормышта кулланырга мөмкин булган гади, әмма нәтиҗәле күнекмәләргә өйрәнеп булачак.
15:30-16:30 сәгатьтә Идел буе халыклары костюмнарын күрсәтелгән интерактив лекция оештырыла. Идел буе халыклары мәдәнияте дөньясына караган, XIX гасыр чорын үз эченә алган традицион костюмнар турында мавыктыргыч лекция тыңлап булачак, диелә хәбәрдә.