Рәсми Татарстан 8 декабрь 2016 11:58

Милли эштә конгресска эшмәкәрләр кушылса, бу милләтебезне тагын да көчәйтәчәк - Миңнеханов

Президент форумда елдан-ел кызыклы проектлар тәкъдим ителүен билгеләп узды.

Скопировать ссылку

(Казан, 8 декабрь, "Татар-информ", Гөлнар Гарифуллина). "Татарстанның эшлекле хезмәттәшләре" форумында елдан-ел кызыклы проектлар турында ишетергә туры килә. Казанның "Корстон" комплексында форумның пленар утырышында Татарстан Президенты Рөстәм Миңнеханов шулай дип белдерде.

"Бер күрешү - үзе бер гомер. Форум елдан-ел киңәя. Ел саен кызыклы проектлар, үрнәк булырлык эшләр тәкъдим ителә", - дип мөрәҗәгать итте республика җитәкчесе. Ул җәмәгать эшлеклесе Тәэминә Биктимерованың кызыклы тарихи мәгълүматлар җиткергәнен әйтте. Сүз уңаеннан, Тәэминә Биктимерова татар мәгарифенә, динебезгә иганә ярдәме күрсәткән татар байлары эшчәнлеге турында сөйләде. Хөсәеновлар, Юнысов, Яушевларның мактаулы эшләре турында бәян итте.

Президент киләчәктә дә телебезне, динебезне, гореф-гадәтләрне саклау мәсьәләләренә игътибар биреләчәген әйтте. "Кая гына барсак та, төбәкләрдә дә, чит илләрдә дә милләттәшләребез белән очрашырга тырышабыз. Конгресс бу юнәлештә эшли, әгәр дә милли эшләргә - сабан туе уздырумы, укыту эшләреме - боларга эшмәкәрләрнең мөмкинлекләрен дә кушсак, бу милләтебезне тагы да көчәйтер иде", - диде Рөстәм Миңнеханов.

Президент форумга килгән бар кешегә рәхмәтен җиткерде. "Республика тарафыннан көчебездән килгәнчә ярдәм күрсәтергә тырышырбыз. Шушы очрашу безнең өчен зур шатлык. Бирегә иң уңган-булганнар җыелган. Төбәкләрдә, чит илләрдә эш ничек куелган - шул матур үрнәкләрне бөтен дөньяга таратырга кирәк", -дип белдерде Рөстәм Миңнеханов.

Татарстан Президенты Указы нигезендә татар активистларына дәүләт бүләкләре тапшырылды.

#"Татарстанның эшлекле хезмәттәшләре" форумы

Сәхифәләр

Милли эштә конгресска эшмәкәрләр кушылса, бу милләтебезне тагын да көчәйтәчәк - Миңнеханов