Михаил Мишустин пандемия вакытында волонтерларга акча түләү кагыйдәләрен раслады
Түләүләр төрле сәбәпләр аркасында ярдәмчесез калган кешеләр турында кайгыртуны үз өстенә алучыларга каралган.
(Казан, 31 май, «Татар-информ»). Волонтерлар, социаль юнәлешле коммерцияле булмаган оешмада эшләүчеләр, социаль хезмәткәрләр һәм пандемия вакытында төрле сәбәпләр аркасында ярдәмчесез калган кешеләр турында кайгыртуны үз өстенә алган гади гражданнарга дәүләт акча түләячәк. Россия Премьер-министры Михаил Мишустин РФ Хөкүмәте карарын имзалады. Бу хакта Министрлар Кабинетының матбугат хезмәте хәбәр итә.
Апрельдән июньгә кадәрге чорда айлык түләүләр инвалидлар, өлкән яшьтәге гражданнар, ятимнәр һәм ата-ана җылысыннан мәхрүм калган балаларны вакытлыча үзләренә сыендыручылар (шул исәптән вакытлыча опекага алучылар) өчен каралган.
«Акчаның күләме ярдәм күрсәтелә торган һәр кеше өчен 12 мең 300 сум тәшкил итә», — дип искәрттеләр ил Хөкүмәтендә.
Түләүләрне Пенсия фонды аша бүлеп бирергә тәкъдим ителә. Акчаны алу өчен гаризаны дәүләт хезмәтләре порталы ярдәмендә быелның 1 октябренә кадәр тапшырырга мөмкин.