Миңнехановка нефть-газ химиясе форумында беренче уңыштан пешерелгән икмәк тапшырдылар
Республиканың Әтнә районында 2020 ел бөртеклеләреннән беренче уңыш җыеп алынды.
(Казан, 2 сентябрь, «Татар-информ», Екатерина Ларионова). Татарстанның Әтнә районы авыл хуҗалыгы хезмәткәрләре нефть-газ химиясе форумы ачылышында республика Президенты Рөстәм Миңнехановка бу елның беренче уңышыннан пешерелгән икмәк тапшырды.
«Сезгә, хөрмәтле Рөстәм Нургалиевич, район авыл хуҗалыгы хезмәткәрләре исеменнән 2020 ел уңышы ашлыгыннан пешерелгән икмәк тапшырабыз!", - диде Әтнә аграрийлары.
Бүгенге көнгә Татарстанда 4,7 млн тонна яңа уңыш җыеп алынган, 1,2 млн гектар (барлык мәйданнарның 83 проценты) мәйданда эш башкарылган. Уртача уңдырышлылык гектардан 36,7 центнер тәшкил итә, бу узган елга караганда 5 центнерга күбрәк.
Искәртеп узыйк, Татарстан нефть, газ, химия форумы 2 сентябрьдән 4 сентябрьгә кадәр уза. Быел чара Татарстан АССР оешуга 100 ел тулуга багышланган һәм ул беренче тапкыр «Казан Экспо» халыкара күргәзмә үзәгендә уза.