Миңнеханов Татарстаннан Федерация Советына кандидатларны билгеләде
Татарстан Президенты Үзәк сайлау комиссиясенә республика җитәкчесен сайлауда кандидат буларак теркәү өчен документлар тапшырды.
(Казан, 20 июль, «Татар-информ»). Татарстан Президенты Рөстәм Миңнеханов республика Үзәк сайлау комиссиясенә Россия Федерация Советы әгъзасының вәкаләтләре бирелергә мөмкин булган өч кандидатура турында белешмә җибәрде. Бу хакта Татарстан Үзәк сайлау комиссиясе матбугат хезмәте хәбәр итә.
Кандидатлар исемлегенә Татарстан мәгариф һәм фән министры Рафис Борһанов һәм Татарстан транспорт һәм юл хуҗалыгы министры Ленар Сафин, шулай ук Татарстан Президенты Аппараты җитәкчесе урынбасары — Эчке сәясәт мәсьәләләре департаменты җитәкчесе Александр Терентьев керде.
Рөстәм Миңнеханов Татарстан Президенты вазифасына сайланган очракта, өч кандидатның берсе хакимият башкарма органыннан сенатор вазифасына билгеләнәчәк.
Хәзер бу урынны парламентның югары палатасында Олег Морозов алып тора, ул шулай ук көзге сайлауларда катнашырга планлаштыра. Гамәлдәге сенатор «Бердәм Россия» праймеризы процедурасын үтте һәм Түбән Кама сайлау округы буенча Дәүләт Думасына депутатлыкка чыгарга планлаштыра.
Татарстан Президенты Рөстәм Миңнеханов бүген Татарстан Республикасы Үзәк сайлау комиссиясендә республика җитәкчесен сайлауда кандидат буларак теркәү өчен документлар тапшырды. Сайлау быел 13 сентябрьдә бердәм тавыш бирү көнендә узачак.