news_header_top_970_100
news_header_bot_970_100

Миңнеханов: Соңгы 7 ел эчендә Татарстанга $9 миллиард чит ил инвестицияләре җәлеп ителде

Татарстан Республикасы өч ел рәттән Россия төбәкләре арасында инвестицион климат торышы рейтингында алдынгы урында бара.

(Казан, 23 ноябрь, «Татар-информ»). Татарстан Республикасы Австрия белән Россия-Австрия мөнәсәбәтләрен ныгытуга һәм үстерүгә юнәлгән хезмәттәшлеккә зур игътибар бирә. Бүген бу хакта Татарстан Республикасы Президенты Рөстәм Миңнеханов Россия-Австрия эшлекле советының пленар утырышында хәбәр итте. Чара Казанда югары технологияләр өлкәсендә «ИТ-парк» технопаркында узды, дип президент матбугат хезмәте җиткерә.

Рөстәм Миңнеханов билгеләп үткәнчә, геополитик вазгыять һәм санкцияләр Россия һәм, аерым алганда, Татарстан икътисадына билгеле бер дәрәҗәдә тискәре йогынты ясый.

«Барлык кыенлыкларга карамастан, безгә инвестицияләр килеп тора, чит ил бизнесы республикабызда үз эшчәнлеген дәвам итә», - диде Татарстан Президенты. Ул хәбәр иткәнчә, республика быелны ҖТП 3-3,5%ка арту белән тәмамларга җыена.

Рөстәм Миңнеханов ассызыклаганча, Татарстан үзара файдалы хезмәттәшлек өчен ачык һәм инвесторлар өчен мөмкин кадәр уңайлы шартлар тудырырга омтыла. Татарстан Республикасы өч ел рәттән Россия төбәкләре арасында инвестицион климат торышы рейтингында алдынгы урында бара.

«Чит илләр компанияләре Татарстан җирендә күптәннән һәм уңышлы эшлиләр, уңай һәм тискәре якларын беләләр, динамика күрәләр. Соңгы 7 ел эчендә Татарстанга $9 миллиардлап чит ил инвестицияләре җәлеп ителгән», - диде Татарстан Президенты.

Республика «Винербергер», «Сваровски», «Ред Булл» һәм башка Австрия фирмалары белән актив хезмәттәшлек итә. «Без багланышлар өчен ачык һәм хезмәттәшлек өчен яңа мөмкинлекләр табуга шат булачакбыз», - диде Рөстәм Миңнеханов.

Бүген шулай ук Татарстан Республикасы Президенты барында КНИТУ-КАИ һәм AVL List GmbH арасында Хезмәттәшлек турында генераль килешү имзаланды. 

news_right_column_1_240_400
news_right_column_2_240_400
news_bot_970_100