Миңнеханов «Россия - Ислам дөньясы» төркемен җыячак һәм Голикова киңәшмәсендә булачак
Владимир Путин кушуы буенча Татарстан Президенты 2014 елдан "Россия - Ислам дөньясы" төркемен җитәкли.
(Казан, 29 ноябрь, «Татар-информ»). Татарстан Президенты Рөстәм Миңнеханов бүген Башкортстан башкаласында «Россия — Ислам дөньясы» стратегик караш төркеме утырышын уздырачак. Шулай ук ул WorldSkills-2019 дөнья чемпионатына әзерлек һәм аны уздыру буенча оештыру комитетының йомгаклау утырышында катнашачак. Бу хакта республика җитәкчесе матбугат хезмәтендә хәбәр иттеләр.
«Россия — Ислам дөньясы» стратегик күзаллау төркеменең V утырышында катнашу өчен Татарстан Президенты Рөстәм Миңнеханов җитәкчелегендәге Татарстан делегациясенең Башкортстан Республикасына визиты планлаштырыла», - диделәр матбугат хезмәтендә.
Казан Кремленең рәсми вәкиле Лилия Галимова ачыклык керткәнчә, пленар өлештә Рөстәм Миңнеханов катнашучыларны Россия Президенты Владимир Путин исеменнән сәламләячәк.
Пленар утырыштан соң «Россия — Ислам дөньясы» стратегик караш төркеме рәисе премияләрен тапшыру тантанасы узачак.
Көннең икенче яртысында Татарстан Президенты Мәскәүгә эшлекле сәфәр кылачак. Анда Россия вице-премьеры Татьяна Голикова җитәкчелегендә WorldSkills-2019 дөнья чемпионатына әзерлек һәм аны уздыру буенча оештыру комитетының йомгаклау утырышы узачак.