Миңнеханов Путиннан йогышлы авырулар хастаханәсе төзелешенә финанс ярдәм сорады
Казанда 232 урынга исәпләнгән йогышлы авырулар хастаханәсен 15 августка сафка бастыру планлаштырыла.
(Казан, 20 май, «Татар-информ», Вероника Ваганова). Татарстан Президенты Рөстәм Миңнеханов Владимир Путиннан Казанда яңа төзелә торган йогышлы авырулар хастаханәсе өчен финанс ярдәм сорады. Бу хакта ул Россия Президенты белән эшлекле очрашу вакытында хәбәр итте.
«Төзеп бетерәсез бит инде, сезгә нинди ярдәм кирәк?» — дип сорады Владимир Путин.
«Әлегә без кредит исәбенә төзибез, бераз акчалата ярдәм итсәгез иде. Хәзер керем аз, без рәткә киләчәкбез. Әгәр сез ярдәм итсәгез, рәхмәтле булыр идек», — диде Рөстәм Миңнеханов.
Россия Президенты бу мәсьәләне карарга вәгъдә итте.
Искәртеп үтәбез, 15 августта Казанда 232 урынга исәпләнгән йогышлы авырулар хастаханәсен сафка бастыру планлаштырыла.