Миңнеханов проектлар буенча РФ Президенты каршындагы Совет утырышында катнаша
ТР Президенты республикада милли проектларны гамәлгә ашыру турындагы мәгълүматны актуальләштерер өчен министрлыклар белән очрашты.
(Казан, 8 май, «Татар-информ»). Бүген Татарстан Республикасы Президенты Рөстәм Миңнеханов Мәскәүгә эш сәфәре кыла. Анда ул стратегик үсеш һәм илкүләм проектлар буенча Россия Президенты каршындагы Совет утырышында катнашачак. Утырышны Россия Президенты Владимир Путин үткәрәчәк. Бу хакта «Татар-информ» мәгълүмат агентлыгына Татарстан Президенты матбугат хезмәтендә хәбәр иттеләр.
Владимир Путин җитәкчелегендәге утырышта Россия Хөкүмәте әгъзалары, Россия Федерациясе Президентының федераль округлардагы тулы вәкаләтле вәкилләре, иҗтимагый һәм бизнес-берләшмәләр, зур компанияләр һәм корпорация җитәкчеләре катнашачак.
Утырыштан соң Татарстан Президенты Россия субъектлары җитәкчеләренең нәтиҗәлелеген бәяләүнең яңа алымнары турында фикер алышачак киңәшмәдә катнашырга планлаштыра. Киңәшмәне Россия Дәүләт Советының «Дәүләт һәм муниципаль идарә» юнәлеше буенча эш төркеме җитәкчесе Сергей Собянин үткәрәчәк.