Спорт 14 гыйнвар 2022 17:21

Миңнеханов: «Дакар»да җиңү Татарстан «КАМАЗ»ларының бәхәссез өстенлеге турында сөйли

Татарстан Президенты җиңүчеләрне - «Дакар»да лидерлыкны икенче ел рәттән саклап калган Дмитрий Сотников экипажын аерым котлады.

Скопировать ссылку

(Казан, 14 гыйнвар, «Татар-информ»). «Дакар» халыкара ралли-рейдында җиңү — «КАМАЗ-мастер» командасының осталыгын, шулай ук Татарстан йөк машиналарының бәхәссез өстенлеген күрсәтә. Бу хакта Татарстан Республикасы Президенты Рөстәм Миңнеханов команданы, аның җитәкчелеген һәм барлык камазлыларны котлаганда белдерде.

«Ике атна дәвамында бөтен ил “Зәңгәр Армада”ның Гарәп чүле лабиринтларын ышанычлы яулавын, экстремаль марафонның барлык кыенлыкларын лаеклы рәвештә башкарып чыгуын, старттан финишка кадәр бәхәссез лидерлыкны саклап калуын һәм көчле көндәшләргә бер генә мөмкинлекне дә калдырмавын соклану белән күзәтте», - диелә ТР җитәкчесенең котлавында.

Рөстәм Миңнеханов җиңүчеләрне - «Дакар»да лидерлыкны икенче ел рәттән саклап калган Дмитрий Сотников экипажын аерым котлады.

«Сезнең белән, күренекле якташларым белән чын күңелдән горурланам, иң дәрәҗәле ярышларда матур һәм мактауга лаек көрәшүегез өчен рәхмәт белдерәм», - диде ул һәм экипажга киләчәктә дә югары урыннар яулауларын теләде.

Телеграмма «КАМАЗ-мастер» командасы коллективына, аның җитәкчесе Владимир Чагинга һәм «КАМАЗ» ГАҖ генераль директоры Сергей Когогинга адресланган.

Сәхифәләр

Миңнеханов: «Дакар»да җиңү Татарстан «КАМАЗ»ларының бәхәссез өстенлеге турында сөйли