Менделеевскида ачык һавада бушлай спорт дәресләре үткәрелә
«Сәламәт Менделеевск» проекты үз тормышларын спортсыз күз алдына китерә алмаучыларны һәм бу юнәлештә юлны яңа гына башлаучыларны берләштерде. Соңгылары өчен дәресләр төрле юнәлешләрне сынап карау һәм күңеленә хуш килгәнне табу өчен уникаль мөмкинлек булды. Бу хакта «Менделеевск яңалыклары» хәбәр итә.
Бу атнада дәресләр ике мәйданчыкта узды. Беренчесе – Ленин исемендәге скверда. Биредә «Беренчеләр хәрәкәте» Россия балалар һәм яшьләр хәрәкәтенең катнашучылары балалар зарядкасы үткәрделәр. Яшь менделеевлылар бу сәгатьне күңелле үткәрде.
«Ышанам, балалар позитив заряд алды. Шулай ук зарядкада катнашучылар «Беренчеләр хәрәкәте» белән якыннан танышты һәм аның белән кызыксынды. Кайберәүләр безнең сафларга керергә теләк белдерде, һәм без моңа бик шат», – диде җитәкче Гөлнара Гайфетдинова.
Киләсе мәйданчык 1нче мәктәп территориясендә урнашты һәм Көнчыгыш биюләренә багышланды. Тренер Полина Каскееваның сизгер җитәкчелеге һәм Көнчыгыш көйләре астында кызлар Хюрем һәм Шахерезада дөньясына чумды. Кызларга ритмик хәрәкәтләрне үзләштерү омтылышына хәтта сирәк яңгыр тамчылары да комачауламады.
Ачык һавада күнегүләр киләсе атнада да дәвам итәчәк. Атнага ике дәрес – балалар һәм өлкәннәр өчен үткәрү планлаштырыла.