Хәвеф-хәтәр 8 октябрь 2009 15:26

“Мечта” кафесында сатуга куелган алкоголь продукция әйләнештән алынган

Инспекторлар тикшерү белән килгәч, хуҗасы тиешле документларны алып килергә киткән җирдән кайтмаган

Скопировать ссылку

(Казан, 8 октябрь, «Татар-информ»). Казанның нәкъ үзәгендә урнашкан “Мечта” кафесында законсыз әйләнештәге ялган алкоголь продукция сатылуы ачыкланды.

Кафе җаваплылгы чикләнгән “Восток” җәмгыятенә карый. Клиентларга биредә “Усадская Хлебная” маркалы шикле аракы тәкъдим иткәннәр. Дәүләт алкоголь инспекциясе белгечләре тарафыннан әлеге товар әйләнештән алынды һәм экспертизага җибәрелде. Тикшерү нәтиҗәләре исә “Восток” өстендә куерган болытларны таратырлык түгел: әлеге продукциягә тиешле документлар юк, ул ГОСТ таләпләренә дә туры килми булып чыга. Урта Идел суд экспертизасы региональ үзәге ясаган экспертиза материалларында “Мечта” кафесыннан алынган аракы шешәләренең капкачлары да заводныкына охшатып кулдан ясалган булырга мөмкин”, диелгән.

Белгечләр әлеге фактка очраклы рәвештә тап булган, дияргә нигез бар. Сентябрь урталарында Дәүләт алкоголь инспекциясенә, спиртлы эчемлекләр белән сату итәргә лицензия алу теләге барлыгын белдереп, “Восток” җәмгыяте мөрәҗәгать итә. Документларында буталчыклыклар ачыклану сәбәпле, әлеге оешманың алкоголь сату урыннарын җентекләбрәк тикшерергә карар кылына.

Тикшерү белән килгән Дәүләт алкоголь инспекциясе хезмәткәрләрен күрүгә, дулкынлануын яшерә алмаган хуҗа, ахыр чиктә, кафедан чыгып кача. Дөресрәге, “Кәҗә белән сарык” әкиятендәге бүреләр кебек, тиешле документларны алып килергә киткән җирдән кайтмый, югала.

Нәтиҗәдә, кафеда сатуга куелган алкоголь продукция әйләнештән алынды. ҖЧҖ “Восток”ка карата административ хокук бозу турында протокол төзелде. Легаль булмаган аракы белән сату итүчегә нинди җәза биреләчәген суд хәл итәргә тиеш, дип хәбәр «Татар-информ» агентлыгына Дәүләт алкоголь инспекциясе.

Сәхифәләр

“Мечта” кафесында сатуга куелган алкоголь продукция әйләнештән алынган