Махсус операциядә катнашучы Зәй хәрбиләре авылдашларына рәхмәт сүзләре белдергән
Махсус хәрби операциядә катнашучы Зәй районы Чыбыклы егетләре исемле посылкаларны алган, авылдашларына шундый ярдәмнәре, терәк булганнары өчен рәхмәтләрен җиткереп җавап юллаганнар. Бу хакта «Зәй хәбәрләре» яза.
Чыбыклы халкы авылдан махсус хәрби операциядә катнашучы егетләргә даими ярдәм итеп килә. Алар 18 мартта Зәйдән киткән гуманитар ярдәм аша үз хәрбиләренә исемле посылкалар әзерләп озатты. Анда егетләр өчен тәм-томнар, оекбаш, перчатка, дымлы салфетка, медикамент һәм тагын бик күп кирәкле әйберләр салынган иде.
«Гуманитар ярдәм җыю эше авыл клубында оештырылды. Битараф калмыйча егетләргә ярдәм кулы сузучы авылдашларга рәхмәт әйтәсе килә. Без җибәргән посылкалар барып җиткән, егетләр рәхмәтләрен әйтеп җавап та җибәрде. Бу көннәрдә махсус хәрби операциядә катнашучыларга аш, икенче ризык әзреләү өчен бәрәңге җыелды, аны Зәйгә агропаркка илтеп тапшырдык» — ди Чыбыклы авыл җирлеге башлыгы Илфат Гадершин.