Мәскәүдә Муса Җәлил исемендәге «Шагыйрь һәм музыка» фестиваленең гала-концерты була
16 майда 19:00 сәгатьтә Мәскәү консерваториясенең кече залында Муса Җәлил исемендәге «Шагыйрь һәм музыка» V Бөтенроссия әдәби-музыкаль фестиваленең гала-концерты була. Бу хакта Татарстан Республикасының Россия Федерациясендәге даими вәкиллеге хәбәр итә.
Чара герой-шагыйрьнең тууына 120 ел тулуга багышланган. Программада «Шагыйрь һәм музыка» фестивале лауреатлары башкаруында Җәлилнең үлемсез шигырьләре, заманча композиторларның әсәрләре һәм классик музыка яңгыраячак.
Фестиваль кунаклары: Татарстанның атказанган артисты Илүсә Хуҗина, композитор Миләүшә Хәйруллина. Концертның сәнгать җитәкче – Муса Җәлилнең оныгы Татьяна Малышева.
Музыка һәм шигърият сөючеләрне, якташларыбызны һәм барлык кунакларны көтеп калабыз, диелә хәбәрдә.
Фото: Татарстан Республикасының Россия Федерациясендәге даими вәкиллеге