Машина йөртү таныклыгындагы тамгалар: Татарстанда нинди чикләүләр бар
Транспортның билгеле бер төре белән идарә итү өчен тиешле категорияле йөртү таныклыгы булырга тиеш. Шул ук вакытта категория үзе дә машина йөртүче үтәргә тиешле өстәмә шартларны күздә тотарга мөмкин. Машина йөртү таныклыкларындагы махсус тамгалар нәрсәне аңлата – «Татар-информ» материалында .
Машина йөртү таныклыкларында аерым тамгаларны кайдан табарга
Машина йөртү таныклыгындагы аерым тамгалар чикләүләр турында белешмәләрне үз эченә ала, алар берьюлы берничә категориягә һәм транспорт подкатегориясенә кагылырга мөмкин. Мондый мәгълүматлар документның 14 нче графасында урнаштырыла. Чикләүләрдән тыш, бу бүлектә машина йөртү стажы турында мәгълүматлар, шулай ук башка өстәмә мәгълүмат булырга мөмкин. Аерым алганда, монда транспорт чарасы конструкциясенең үзенчәлекләренә бәйле аерым медицина чикләүләре һәм шартлары да күрсәтелә.
Аерым бер категориягә яки подкатегориягә генә кагылышлы махсус тамгалар да каралган. Алар йөртүче транспортның конкрет төре белән идарә итәргә хокуклы булган шартларны чагылдыра. Мондый белешмәләр 12 нче графага, тиешле категория каршына языла.
Машина йөртү таныклыгында нинди тамгалар булырга мөмкин
AT – йөртүче автоматик тапшыру коробкасы белән җиһазландырылган транспорт чарасыннан гына файдаланырга хокуклы.
MS – B1 подкатегорияле транспорт белән идарә итү өчен мотоцикл утыргычы яки мотоцикл тибындагы руль таләп ителә.
AS – йөртүче мототранспорт белән автомобиль тибындагы утыргычта мотоцикл руленнән башка идарә итә ала. Мондый тамга трициклларга һәм массасы 0,4 тоннадан артмаган квадроциклларга карый. Ул А категорияле транспорт белән идарә итү хокукы булмаганда билгеләнә.
ML – йөртүче мопедлар, скутерлар һәм квадроцикллар белән идарә итәргә хокуклы түгел.
HA/CF – медицина күрсәткечләре буенча транспорт белән ишетү сәләте бозылуны компенсацияли торган махсус чаралар кулланганда гына идарә итәргә рөхсәт ителә.
MC – бары тик механик коробкалы транспорт чарасы белән генә идарә итү рөхсәт ителә.
APS – йөртүче парковкада акустик ярдәм системасы, ягъни парктроник белән җиһазландырылган автомобильләрдән генә файдалана ала.
GCL - транспорт чарасы белән күзлек яки контактлы линзалар кулланып кына идарә итү рөхсәт ителә.
Машина йөртү таныклыгында теге яки бу тамганың кайда күрсәтелүен исәпкә алу мөһим. Әгәр AT, MS, AS яки ML тамгалары 14 нче графада булса, билгеләнгән чикләү йөртүче идарә итәргә хокуклы булган барлык транспортка кагыла. Мондый билге 12 нче графада урнаштырылганда, ул бары тик янәшәдә генә күрсәтелгән категориягә яки транспорт чаралары подкатегориясенә карый.