news_header_top_970_100
16+
news_header_bot_970_100

Март аенда Татарстанда инфляция 1,9 процентка кадәр төште

Татарстанда быелның мартында еллык инфляция 1,9 процент тәшкил иткән, февральдә ул 10,7 процент булган. Россия Банкы бүлеге – ТР Милли банкы шундый мәгълүматлар китерде.

Узган айда азык-төлек товарларына бәяләрнең үсеш темпы 2,7 процент (февральдә – 10 процент) тәшкил иткән. Шул ук вакытта, шикәр бәясе 2022 елның марты белән чагыштырганда 27 процентка арзанайган. Икмәк-күмәч һәм макарон эшләнмәләренең дә (узган елгы күрсәткеч белән чагыштырганда 7,5 процентка) бәясе кимегән.

Азык-төлек булмаган товарларга исә 1,6 процент дәрәҗәсендәге дефляция күзәтелә. Узган ел белән чагыштырганда, телерадиотоварларга бәяләр – 40, элемтә чараларына – 28, компьютерларга – 12, төзелеш материалларына 13 процентка арзанайган.

Шул ук вакытта, юу-чистарту чаралары, шулай ук парфюмерия һәм косметика бәяләре 16 процентка арткан.

Март аенда хезмәт күрсәтү өлкәсендә бәяләр үсеше – 6,6, февральдә 12 процентка акрынайган. Шуның белән бергә, чит ил туризмы хезмәтләре – 30, санитар-сәламәтләндерү – 19, пассажир транспорты хезмәтләре 18 процентка кыйммәтләнгән.

autoscroll_news_right_240_400_1
autoscroll_news_right_240_400_2
news_bot_970_100