Марий-Эл кунагы драматурглар семинарында татарча биеп күрсәтте
Ипполит Лобанов драматургия халыкларны берләштерә дигән фикердә.
Скопировать ссылку
(Биектау районы, 6 июль, «Татар-информ», Энҗе Габдуллина). Бүген Биектау районы Кече Битаман авылында бөтенроссия драматурглар семинарының ачылыш тантанасында Марий-Эл Республикасыннан килгән халык язучысы Ипполит Лобанов халыкны көйсез генә татарча биеп шаккаттырды.
«Узган гасырның 60 нчы елларында мин Казанда офицер булып хезмәт иттем, шәһәрдә элемтә тоташтырып йөрдек. Кыскасы, минем татарстанлылар белән элемтәм һәрчак булды, эш буенча да, драматургия буенча да», - диде ул.
«Мин татар җырларын бик яратам. Хәзер шул җырның ике юлын гына хәтерлим. «Ай, дусларым, дусларым» дигән сүзләре бар. Татарча биергә дә яратам», – дип, көйсез генә татарча биеп тә күрсәтте.
Ипполит Лобанов төрле милләт арасында дуслык саклансын иде дигән теләген дә белдерде. «Драматургия, театр халыкларны берләштерә. Казанга килгән саен сезнең спектакльләрне карыйм. Искиткеч спектакльләр була. Тәрҗемәсез дә барысын да аңладым. Халыклар арасындагы дуслык саклансын!» – диде.