Марий Элда оештырылган XXIV Федераль Сабантуйның программасы билгеле

Бүген Марий Элда, Медведев ипподромында, XXIV Федераль Сабантуйның икенче көне узачак. «Марийская правда» хәбәр иткәнчә, бүген бәйрәм программасы бай булачак.

Республикада Сабантуйны 1 июльдән үк бәйрәм итә башлаганнар — беренче көннәрдә төбәк халкы һәм кунаклары өчен төрле күргәзмәләр үткәрелгән, ә 5 июльдә ат ярышлары, мари һәм татар артистлары катнашында концерт һәм «Түгәрәк уен» интерактивы оештырылган. Бүген, 6 июльдә, 11.00 сәгатьтә төп сәхнәдә Федераль Сабантуйны рәсми ачу һәм «Тулпар» канатлы бронза ат символын тапшыру тантанасы узачак.

«Уйна, гармун!» сәхнәсендә тамашачылар Бөтенроссия гармунчылар фестивале катнашучыларның чыгышларын, ә кичен «Кичке уен» концерт-күңел ачу программасын карый алачак. Төштән соң спорт мәйданчыгында милли көрәш, кул көрәше, мас-рестлинг, гер күтәрү спорты, көч экстримы, аркан тарту буенча ярышлар һәм җәядән ату буенча Бөтенроссия ярышлары узачак. Кече спорт мәйданчыгында ат ярышлары һәм «Аударыш» атка атланып көрәшү милли ярышы узачак.

Шулай ук Федераль Сабантуй мәйданчыгында Түбән Кама районы мәйданы эшләячәк. Татарстан артистлары бәйрәм кунакларын иҗади программа, декоратив-гамәли сәнгать осталары үз продукциясен күргәзмә-сату белән сөендерәчәк. Шулай ук мәйданчык кунаклары татар сыйларын татып карый алачак.

Балалар мәйданында бәйрәмнең кечкенә катнашучылары өчен уен программасы әзерләнә. Биредә шулай ук «Тукай шигырьләре минем күңелемдә» республика рәсем конкурсы җиңүчеләре билгеләнәчәк.

Сабантуй мәйданчыгында Марий Эл муниципаль берәмлекләренең ишегаллары күргәзмәсе дә эшләячәк. Кунакларны презентацияләр, театральләштерелгән тамаша, төрле экспозицияләр һәм мастер-класслар көтә. Шулай ук «Бармак» татар печеньесын пешереп, рекорд кую планлаштырыла. Аннан соң бәйрәм кунаклары печенье белән сыйлана алачак. Шулай ук «Татар ишегалды» мәйданчыгында да күргәзмә-презентация әзерләнә. Биредә дә декоратив-гамәли сәнгать эшләнмәләре, татар ризыклары сатылачак. Катнашучылар милли ризыкларны татып карый алачак.

Бәйрәм кунаклары җирле җитештерүчеләрнең продукциясен «Марий Элда эшләнгән» мәйданчыгында сатып ала ала. Шулай ук «Китап ярминкәсе» мәйданчыгында мари һәм Татарстан китап нәшриятлары һәм В.М. Васильев исемендәге Мари тел, әдәбият һәм тарих фәнни-тикшеренү институтының продукциясен сатып алырга мөмкин булачак. «Милли аш-су» мәйданчыгында Марий Элда яшәүче халыкларның ризыкларын татып карарга булачак.

Бәйрәмдә күрергә мөмкин булган соңгы мәйданчык — «Авыл хуҗалыгы техникасы». Төбәк халкы һәм кунакларын төрле техникадан – авыл хуҗалыгы техникасы, яңа автомобиль, мотоцикл, квадроцикл һәм ретроавтомобильләрдән торган күргәзмә көтә.