Марат Садыйков быел Татарстанда төзеләчәк медицина оешмаларын атады
Казанның 7нче шәһәр клиник хастаханәсе базасында Трансплантология үзәге барлыкка киләчәк.
(Казан, 29 гыйнвар, "Татар-информ", Гөлнар Гарифуллина). Татарстанның сәламәтлек саклау министры Марат Садыйков 2019 елда барлыкка киләчәк яңа медицина оешмаларын атады.
Татарстан Президенты Рөстәм Миңнеханов катнашында узган коллегия утырышында быел Казанның 7нче шәһәр клиник хастаханәсе базасында трансплантология үзәге төзеләчәген әйтте. Бу нисбәттән, академик Шумаков исемендәге Илкүләм трансплантология һәм ясалма органнар медицина тикшеренү үзәге белән килешү төзелгән.
Марат Садыйков быел Яр Чаллыда Республика клиник онкологик диспансерның филиалын һәм Балалар онкология, гематология һәм хирургия үзәген төзү бурычы торганын билгеләп узды.
Шулай ук, министр сүзләренчә, Казанда кан тамыры үзәге һәм кан әйләнеше бозылган авырулар өчен ике региональ үзәк ачылышы ниятләнә.
Казанда Сугыш ветераннары госпитале базасында региональ гериатрия үзәген ачу көтелә.
Быел районнар сәламәтлеге паспортын формалаштыру дәвам иттереләчәк . Амбулатор онкология ярдәменең 9 муниципальара үзәге төзеләчәк.