Марат Садыйков: Без стационарлар ремонты буенча өч еллык программа тәкъдим итәргә әзер
"Бүген стационарлар капиталь ремонтка һәм реконструкциягә мохтаҗ", - диде ТР сәламәтлек саклау министры.
(Казан, 29 гыйнвар, "Татар-информ", Гөлнар Гарифуллина). Татарстанның Сәламәтлек саклау министрлыгы стационарларны ремонтлау буенча өч еллык программа тәкъдим итәргә әзер. Бу хакта коллегия утырышында ведомство башлыгы Марат Садыйков әйтте.
Ул тармакта беренчел звено төп проблема булганын, матди-техник базаны ныгыту, заманча җиһазлау юнәлешендә эш уздырылганын искәртте. Сырхауханәләрне капиталь төзекләндерү буенча ике еллык программа тәмамланганын билгеләп узды.
"Ләкин бүген стационарлар да капиталь ремонтка һәм реконструкциягә мохтаҗ. Әгәр сездән фәрман булса, без стационар учреждениеләрне модернизацияләү буенча өч еллык программа эшләп тәкъдим итәргә әзер", - дип мөрәҗәгать итте Марат Садыйков Татарстан Президенты Рөстәм Миңнехановка.