Марат Җәббаров: Республикада шикәр чөгендере орлыкларының 77 проценты кайтарылган

Авыл хуҗалыгы һәм азык-төлек министры әйтүенчә, шикәр чөгендере мәйданнары элеккечә сакланачак.

Скопировать ссылку

(Казан, 15 март, «Татар-информ», Гөлнар Гарифуллина). Республикада шикәр чөгендере орлыкларының 77 проценты кайтарылган, калганнары буенча эш бара, контрактлар төзелгән.

Бу хакта Министрлар Кабинетында брифингта ТР Премьер-министры урынбасары — авыл хуҗалыгы һәм азык-төлек министры Марат Җәббаров әйтте.

«Шикәр чөгендере мәйданнарын шул күләмдә саклап калабыз. Алар завод куәтләренә, заводлар эшкәртергә өлгерерлек күләмнәргә туры килә. Уңышлы елларда 2 млн тоннадан артык шикәр чөгендере җыя идек, бу күләмнәр үзебезне тәэмин итүгә дә, читкә сату өчен дә җитә», — диде министр.

Ул узган елны корылык аркасында шикәр чөгендере уңышы ике мәртәбә ким булганын искәртте.

Марат Җәббаров сүзләренчә, көнбагыш, кукуруз мәсьәләсендә дә килешү бар. «Орлыклары пландагыча кайтып җитәргә тиеш», — дип ышандырды.

Сәхифәләр

Марат Җәббаров: Республикада шикәр чөгендере орлыкларының 77 проценты кайтарылган