Марат Әхмәтов: Язучылар милләт һәм тел сагында иң алгы сафта булырга тиеш!
27 март көнне «Корстон» мәдәният комплексында Татарстан Язучылар берлегенең XX корылтае узды. ТР Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе рәисе Марат Әхмәтов язучылар турындагы фикерләре белән уртаклашты.
- Язучылар берлеге – ул яхшы машина кебек, монда интеллигенциянең сөт өсте җыелган, әмма ул машина гел йөреп торсын, хәрәкәттә булсын өчен, аңа беткәннән-беткәнгә ягулык өстәп торырга кирәк. Сораучысы сорый белсә, хөкүмәт беркайчан да ул машинаны ягулыктан өзмәячәк.
Язучылар милләт һәм тел сагында иң алгы сафта булырга тиеш! Ул гына түгел, сез – үзегезгә алмаш әзерләү өчен дә җаваплы шәхесләр. Югыйсә ул милли басмаларны, хәтта сезнең үзегез язган әсәрләрегезне дә киләчәктә кем укыр?! – ди ул.
ТР Дәүләт Советы Рәисе урынбасары Марат Әхмәтовның Татарстан Язучылар берлегенең XX корылтаендагы чыгышыннан төп фикерләрне «Интертат» сайты өчен Зөлфия Шәвәлиева язды.
