Марат Әхмәтов: Халыклар мәдәниятенә хөрмәт – Татарстанда татулык нигезе
2026 елда илебездә игълан ителгән Россия халыклары бердәмлеге елы Татарстан өчен аерым әһәмияткә ия. Төбәктә 175 милләт вәкиле гармониядә яши. Илебездә яшәүче халыкларның мәдәниятенә, телләренә, гореф-гадәтләренә хөрмәт иҗтимагый татулыкның ышанычлы нигезе булып тора.
Бу хакта бүген Казанда Бәшир Рәмиев исемендәге ИТ-паркта «Бердәмлектә көч» Татарстан Республикасы гражданнар форумында ТР Дәүләт Советы Рәисе вазифаларын башкаручы Марат Әхмәтов хәбәр итте.
«Быел Татарстан Иҗтимагый палатасына 20 ел тулды. Бу вакыт эчендә ул социаль үсеш мәсьәләләре буенча киң фикер алышу өчен абруйлы мәйданчыкка әверелде, тотрыклы рәвештә төбәк палаталары арасында лидерлар рәтенә керә. Бу – 2025 ел нәтиҗәләре буенча Россия Иҗтимагый палатасы рейтингында югары өченче урын булуы белән дә раслана», – дип билгеләп үтте ул.
Әхмәтов шулай ук хәбәр иткәнчә, Татарстан Республикасы Иҗтимагый палатасының Гражданнар җәмгыяте институты һәм иҗтимагый хәрәкәтне координацияләү үзәге буларак роле даими рәвештә арта бара.
Форум ТР Иҗтимагый палатасы инициативасы һәм ТР Хөкүмәте ярдәме белән узды. Чарага хакимият органнары, бизнес, коммерциячел булмаган сектор, дини һәм этномәдәни оешмалардан, Иҗтимагый Советлардан һәм волонтерлардан 600дән артык вәкил җыелды.
Форум эшендә ТР Премьер-министры урынбасары Ләйлә Фазлыева, ТР Иҗтимагый палатасы рәисе Александр Терентьев, махсу3с операция катнашучылары, яшьләр оешмалары вәкилләре һәм башкалар катнашты. Фикер алышу үзәгендә – тормыш сыйфаты өстенлекләре, гражданлык җәмгыятен үстерү, милләтара һәм динара татулыкны ныгыту, бизнесның социаль җаваплылыгы, патриотик тәрбия, иреклелек, җәмәгатьчелек фикерен формалаштыруда массакүләм мәгълүмат чараларының роле, шулай ук гражданлык бердәмлеге һәм каһарманлык мәсьәләләре.
Пленар өлеш йомгаклау резолюциясе кабул итү белән тәмамланды. Форум хакимиятнең, бизнесның һәм җәмгыятьнең тырышлыгын берләштерергә, милләтара дөньяның тотрыклы традицияләрен күрсәтергә һәм гражданнарның республика тормышында катнашуының нәтиҗәле формаларын билгеләргә тиеш.