Марат Әхмәтов «Тукай йолдызлыгы» конкурсында җиңүчеләрне бүләкләде
«Тукай йолдызлыгы» татар телендәге әдәби әсәрләр конкурсында җиңүчеләрне ТР Милли китапханәсендә бүләкләделәр.
«Республикада һәм татар дөньясында Тукай елы бара. Без-Тукай халкы, бәхетле һәм мәгърифәтле, галим һәм рухи яктан бай, чөнки безнең Тукай кебек шәхесләребез бар», - диде тантанада ТР Дәүләт Советы рәисе вазифаларын башкаручы Марат Әхмәтов.
Конкурс сигез номинациядә үткәрелде:
- «Шигырьләр шәлкеме», җиңүче Ләйсән Гатина;
- «Поэма» җиңүчесе Лилия Гыйбадуллина;
- «Хикәя», җиңүче Марат Кәбиров;
- «Бәян», җиңүче Факил Сафин;
- «Пьеса», җиңүче Гөлүсә Батталова
- «Эссе», җиңүчесе Лилия Фәттахова;
- «Тукай дәресе», җиңүчесе Рәхим Хәйров;
- «Тукай тәрбиясе», җиңүче Камәрия Вафина.
Һәр номинациядә, җиңүчеләрдән тыш, сертификат һәм акчалата приз белән катнашучыларны «кызыксынулары өчен» билгеләп үттеләр. Мәсәлән, «Поэма» номинациясендә Илсөяр Иксанова, ә Рабит Батулла ике тапкыр «Эссе» һәм «Тукай дәресе» номинацияләрендә бүләкләнде.
Җиңүчеләргә бүләкләрне Марат Әхмәтов, Бөтендөнья татар конгрессы Башкарма комитеты җитәкчесе Данис Шакиров, ТР Язучылар берлеге рәисе Ркаил Зәйдулла һәм филология докторы һәм КФУ профессоры Дания Заһидуллина тапшырдылар.
«Габдулла Тукай – безнең кыйбла, һәм без аңа тугры булырга һәм бу тугрылыкны киләчәк буыннарга тапшырырга тиеш», – дип билгеләп үтте Марат Әхмәтов.
Татар телендә әдәби әсәрләр конкурсы Габдулла Тукайның 140 еллыгына багышлап үткәрелде. Чараны оештыручылар: ТР Язучылар берлеге һәм республикада яшәүче халыкларның татар телен һәм туган телләрен саклау, үстерү мәсьәләләре буенча ТР Рәисе каршындагы комиссия.