Марат Әхмәтов: Ифтар кичәләре күңелебезне, рухыбызны чистарта
ТР Дәүләт Советы Рәисе урынбасары, Татарстан Республикасы Рәисе каршындагы Татар телен һәм Татарстанда яшәүче халыклар вәкилләренең туган телләрен саклау, үстерү мәсьәләләре комиссиясе Рәисе Марат Әхмәтов ифтар кичәсен күңелне, рухны чистарта торган очрашу дип саный.
«Аллаһы Тәгаләгә ышанам. Мондый вакыйгаларга бик зур бәһа бирәм, күңелебезне, рухыбызны чистарта торган мондый очрашуларда беркем тискәре, начар уйлар уйламый. Игелек, яхшылык турында уйлыйбыз. Рамазан аеның шушы рухыбызны чистарту, җәмгыятьне савыктыру күзлегеннән әһәмиятен бик югары бәялим», – диде ул «Туган авылым» милли-туристик комплексында оештырылган быелгы беренче ифтарда.
Аның фикеренчә, җәмәгатьчелек киләчәкне өметле итеп күрәсе килсә, дин, әхлак, тәрбия юлында булу хәерле. «1990 еллар башында кыйблабызны югалтып, көнбатыштан бәхет эзләп, саташып йөрдек. Шул чор эчендә генә тулы буын үсеп чыкты. Ниһаять, үзебезнең кыйблабызны табып, көннән-көн тирәнрәк шул кыйблага таба юнәлә барабыз, чистарынабыз. Кыйблабыздан тайпылмыйча, үзебез, балалар, оныклар шушы юлдан барсак иде», – диде Марат Әхмәтов.