Марат Җәббаров Биектау мәктәбендә агротехнология сыйныфын ачты
Бүген Татарстан вице-премьеры – авыл хуҗалыгы һәм азык-төлек министры Марат Җәббаров Биектауның 3нче номерлы урта мәктәбендә агротехнология сыйныфын ачты. Чарада шулай ук район башлыгы Равил Хисаметдинов та катнашты. Бу хакта Татарстан Республикасы Авыл хуҗалыгы һәм азык-төлек министрлыгы матбугат хезмәте хәбәр итте.
Яңа сыйныф «Биотехнологияләр һәм азык-төлек җитештерү» юнәлешендә эшләячәк. Мәгариф проектының инвесторы – «Елмай» авыл хуҗалыгы кулланучылар кооперативы.
Сыйныф «Агросәнәгать комплексында кадрлар» федераль проекты («Азык-төлек иминлеген технологик тәэмин итү» илкүләм проекты) кысаларында ачылды. Хәзерге вакытта агротехнологик сыйныфлар челтәре Татарстанның 14 районын колачлый.