Мансур хәзрәт Җәләлетдинов: Мөселманның Аллаһтан ялварып сораганы буш калмас
Казанның «Мәрҗани» мәчетендә Корбан гаете узды.
Казанның «Мәрҗани» мәчете имам-хатыйбы Мансур хәзрәт Җәләлетдинов Корбан бәйрәме уңаеннан сөйләгән вәгазендә мөселманның Аллаһтан ялварып сораганы буш калмас дип белдерде һәм теләгән әйберләрне Ходайдан сорарга өндәде.
Бүген таң атканда мөселманнар Татарстанның 1,5 меңнән артык мәчетенә Корбан бәйрәме уңаеннан гает намазына җыелды. «Татар-информ» хәбәрчесе бәйрәм намазына Казанның иң борынгы гыйбадәт йортларының берсе «Мәрҗани» мәчетенә килде. Гает вәгазен мәчетнең имам-хатыйбы Мансур хәзрәт Җәләлетдинов сөйләде.
Фото: © Абдул Фархан
Хәзрәт сүзләренчә, Адәм баласы бу дөньяга сынау узу өчен килә.
«Аллаһы Тәгалә безне төрлечә сыный. Артык яңгырын бирсә дә, артык карын бирсә дә – сынау. Пандемия зәхмәте дә безнең өчен сынау иде. Аллаһ байлык белән дә, ачлык белән дә сынар. Сынауны узучыларга җәннәт капкалары ачылыр. Тормыштан зарланып яшәүчеләргә Ходай тагы да начаррагын, ә булганына сөенә белүчеләргә тагы да яхшырагын күрсәтер», - диде Мансур хәзрәт Җәләлетдинов.
Фото: © Абдул Фархан
Хәзрәт корбан чалу йоласының килеп чыгу тарихын искә алды, корбан чалу тәртибе белән таныштырды, мөселманнарга фарыз гамәлләр турында сөйләде, Татарстан Президенты Рөстәм Миңнеханов котлавын укыды, үз исеменнән дә мөселманнарны бәйрәм белән котлады.
Мәчеттә вәгазь сөйләнгәннән соң бар кеше намазга басты. «Мәрҗани» мәчетенә сыймаганнар намазны ишегалдында укыды.
Фото: © Абдул Фархан
Бәйрәм намазыннан соң «Мәрҗани» мәчете янындагы махсус урында корбан чалу башланып китте. Казанда корбан чалу өчен 17 махсус мәйданчык булдырылган. Башка шәһәр һәм районнарда 22 урын каралган. Барлыгы – 39 урын.
Фото: © Абдул Фархан
Корбан чалу өч көн дәвам итәчәк. «Мәрҗани» мәчетендә сарыклар өч көнгә калмас дип фаразладылар. Халык чират торып корбан чалдыра. Биредә сарык бәясе 10 мең сумнан 16 мең сумга кадәр куелган. Малны эшкәртеп һәм тураклап бирү бер мең сумга бәяләнгән.