Мансур хәзрәт Җәләлетдин: Аллаһы Тәгалә сугыш афәтеннән сакласын иде
«Татарстан – Яңа Гасыр» телерадиокомпаниясе заказы буенча «Кеше китә – җыры кала» телесериалы төшерелде. Ул «ТНВ-Татарстан» һәм «ТНВ-Планета» каналларында күрсәтелде. Татарстан мөфтиенең махсус хәрби операциядә катнашучыларга, аларның гаиләләренә ярдәм итү буенча урынбасары Мансур хәзрәт Җәләлетдин сериалдан алган хис-кичерешләре белән уртаклашты.
«Күңелгә хәтле үтте. Карагыз, кешеләрне ничек сугышка озаталар. Бүгенге көндә дә махсус хәрби операция бара, ә мин үзем бүгенге көндә шундый вазифада, миңа бик еш Донецк, Луганск, Херсон якларына йөрергә туры килә. Мин даими рәвештә солдатлар белән дә, аларны озатып калган ата-аналары, хатыннары, балалары белән дә очрашып торам. Бу – бик авыр, аяныч хәл.
Ул вакытта халык ничек ярдәм иткән булса солдатларыбызга, бүгенге көндә дә халык ярдәм итәргә ашыгып тора. Кемдер «маскировочный» челтәрләр бәйли, кемдер ризыклар әзерли. Аллаһы Тәгалә сугыш афәтеннән сакласын иде», -ди ул.
«Кеше китә – җыры кала» телесериалының бер сериясе «Мир» кинотеатрында күрсәтелде. Аны караучыларда туган фикерләрне «Интертат» сайты өчен Камилә Билалова язды.
