Мамадыштан хәрбиләргә ярдәм итүче Зиннәтуллиннар гаиләсе: Нык гаиләнең нигезе - яратуда
Мамадышта яшәүче Зиннәтуллиннар гаиләсе, махсус хәрби операция башланганнан соң, беренчеләрдән булып волонтерлар отрядын булдыралар һәм махсус хәрбия операциядә катнашучыларга гына түгел, ә аларның гаиләләренә дә ярдәм итә башлыйлар. Бүген алар ТНВ-Яңа гасыр телеканалында Гаилә елына багышлап уздырылучы телемарафонда катнаштылар.
«Волонтерлар отрядын без махсус хәрби операция башланыр алдыннан нигезләгән идек. Иганәчеләр һәм халык ярдәме белән җыелган киемнәрне, тепловизорны, ашамлыкларны без махсус хәрбия операция зонасына үзебез илтәбез. Шулай ук хәрбиләрнең гаиләләренә дә булышабыз», – дип сөйләде эшчәнлекләре турында Раил Зиннәтуллин.
Алар үзләренең гаилә тарихлары, танышулары турында да сөйләделәр. «Безнең мәхәббәт тарихы кәрәзле телефоннан башланды. 2005 елда бездә телефон салоннары юк иде, шуңа күрә без телефонны кешедән алырга булдык. Ә телефонны сатучы нәкъ менә Раил булып чыкты. Барысы да шул телефоннан башланып китте», – дип сөйләде танышу тарихлары турында Энҗе.
Энҗе сүзләренчә, алар бер-берсе арасындагы җылы мөнәсәбәтләрне, низаг туган очракта, юл куеп, киңәшләшеп, уртак фикергә килеп үткәреп җибәрәләр. «Тәмле тел белән дә», – дип өстәде Раил.
Бүген аларның бергә яши башлауларына 17 ел булган. «Нык гаиләнең нигезе – бер-береңне ихтирам итүдә һәм яратуда», – ди гаилә вәкилләре.