Мамадышның иң зур сайлау участогында актив тавыш бирәләр
1866нчы участокка беркетелгән сайлаучыларның 76 проценты Төп законга төзәтмәләр буенча вакытыннан алда тавыш бирде.
(Казан, 1 июль, «Татар-информ»). Академик Вәлиев исемендәге лицей тавыш бирү өчен Мамадышның иң зур мәйданчыгына әверелде. 1866нчы сайлау участогына 1741 кеше беркетелгән, шуларның 1350е вакытыннан алда тавыш биргән. Бу хакта «Нократ» газетасы яза.
Уку йорты директоры Салават Гыймранов сүзләренчә, 25 июньнән 30 июньгә кадәр лицейда 76 процент сайлаучы тавыш биргән. Бүген участок иртәнге сигездән кичке сигезгә кадәр эшли. Кичке бишкә кадәр теләүчеләр өйләрендә тавыш бирергә гариза бирә ала.
Беренче ике көндә тавыш бирүчеләр күп булган. Тавыш бирү башланганнан алып, хокук бозулар теркәлмәгән. Сайлау участогында санитария куркынычсызлыгы кагыйдәләре катгый үтәлә. Барлык тавыш бирүчеләргә шәхси саклану чаралары һәм ручка бирелә.