Мамадыш районында Кама елгасы аша боз кичүе ачылды
Боз кичүен бер сменада 100 машина үтеп чыга ала.
(Казан, 14 декабрь, “Татар-информ”) Бүген Татарстанның Мамадыш районында Соколка авылы һәм Яңа Закамский бистәсе янында Кама елгасы аша боз кичүе ачылды. Биредә авырлыгы 2,5 тоннадан артмаган автомобильләргә иртәнге 6.00 сәгатьтән кичке 22.00 сәгатькә кадәр чыгып йөрергә рөхсәт ителә. Бу хакта Россия Гадәттән тыш хәлләр министрлыгының Татарстан буенча Баш идарәсе матбугат хезмәте хәбәр итә.
Хәзерге вакытта бозның калынлыгы – 30 сантиметр. Бер сменага моннан 100 машина үтә ала. Ике яклы хәрәкәт булдырылган, полосалар арасындагы ара 50 метрны тәшкил итә. Боз кичүендә бөтен кирәкле юл билгеләре, шлагбаумнар, прожекторлар урнаштырылган. Ике ярда да җылыну пунктлары эшли. Карны чистарту өчен “МТЗ-80” һәм “Джина” тракторлары бар. Елганың уң ярында Соколка бистәсе янында “Буран” снегоходы кизү тора.
