Мамадыш интернат-мәктәп укучылары юнифайд-футбол буенча турнирда өченче урынны алды
Ярышлар 17-21нче июль көннәрендә Чикагода узды.
(Казан, 27 июль, "Татар-информ"). Мамадыш интернат-мәктәп укучылары юнифайд-футбол буенча Бөтендөнья турнирында бронза призерлар булдылар. Бу хакта Татарстан Мәгариф һәм фән министрлыгы матбугат хезмәте хәбәр итә.
Ярышлар 17-21нче июль көннәрендә Чикагода узды. АКШта Россияне Татарстан командасы тәкъдим итте. Беренче турда республика командасы Техас штаты командасын җиңде (3:0), икенче турда Берләшкән Гарәп Әмирлекләре командасына оттырды, ә өченче турда Канада командасын җиңде(9:2). Ярымфиналда егетләр Метца клубы базасында оешкан көчле Франция командасына оттырды (0:3).
Команда белән Мамадыш интернат-мәктәбе физкультура укытучысы Андрей Куклев һәм баш тренер Кадыр Мамонов җитәкчелек иттеләр.
Мамадыш мәктәп-интернат егетләре 25 – 29нчы ноябрь көннәрендә Санкт-Петербургта узачак Бөтенроссия Спартакиадасы Кубогы мини-футбол (футзал) буенча Махсус Олимпиадада катнашачак.