Фән һәм мәгариф 7 февраль 2019 11:35

Максим Акимов Иннополис Университетына финанс ярдәме күрсәтү вариантларын карарга кушты

Югары уку йортының агымдагы еллык бюджеты 1 миллиард 200 миллион сум тәшкил итә. Аның яртысы – иганәчеләр акчасы.

Скопировать ссылку

(Казан, 7 февраль, «Татар-информ», Динара Прокопьева). Россия вице-премьеры Максим Акимов Татарстан Президенты Рөстәм Миңнеханов катнашындагы киңәшмәдән соң Иннополис Университетына финанс ярдәме күрсәтү вариантларын карарга кушты. Казан Кремленең рәсми вәкиле Лилия Галимова ТР Хөкүмәте йортында узган брифингта шул хакта хәбәр итте.

«Бүген әлеге югары уку йорты ил өчен өстенлекле юнәлеш – цифрлы икътисад өчен кадрлар әзерли. Университет бастырып чыгарган мәгълүматлардан күренгәнчә, вузның агымдагы еллык бюджеты 1 миллиард 200 миллион сум тәшкил итә. Аның яртысы – иганәчеләр акчасы», - дип искәртте ул.

Рөстәм Миңнеханов Максим Акимов белән очрашуда искәрткәнчә, илнең өстенлекләрен исәпкә алып, Иннополис Университеты киләчәктә цифрлы икътисад буенча төп вузларның берсенә әверелергә тиеш. Әлеге тармакта белгечләргә кытлык күзәтелә һәм югары уку йорты аларны әзерләү белән шөгыльләнергә әзер, диде Галимова.

«Максим Акимов ТР Президенты күтәргән теманы хуплады. Ул вузның дәүләт ярдәме күрсәтүдә кайсы программаларда катнаша алу мөмкинлеге турында белешмә әзерләргә, шулай ук Иннополис Университетына ярдәм күрсәтүнең башка вариантларын карарга йөкләмә бирде», - дип белдерде Казан Кремленең рәсми вәкиле.

Ул билгеләп үткәнчә, биредә вузның яртылаш федераль бюджеттан финанслануы ихтималы хакында бара.

Бүген Иннополис Университетында 602 студент белем ала. Югары уку йортында 14 лаборатория һәм 7 фәнни үзәк эшли. Узган елда вузны тәмамлаган 149 яшь белгечнең барысы да эшкә урнаштырылган.

#Иннополис

Сәхифәләр

Максим Акимов Иннополис Университетына финанс ярдәме күрсәтү вариантларын карарга кушты