Татар әдәбияты 5 май 2023 00:06

Мәҗит Гафури. ***(«Үзенең гаклына татбикъ итеп диннәрне һәр милләт...»)

Скопировать ссылку

***
Үзенең гаклына татбикъ итеп [1] диннәрне һәр милләт,
Буңа чаклы бу дөньяда ничә диннәр бозылгандыр.
Җидаль [2] һәм ихтиляль [3] берлән бетерделәр китапларны,
Явыз куллар кереннән сакланып калганы – Коръәндер.

Һабил кател итеп [4], Кабил кабул итмәде тәүбәне,
Шу [5] көннән бу көнгә чаклы бу дөнья кып-кызыл кандыр.
Бәни адәмдә һәр заман гөнаһ кыйлмак – гадәт бер эш,
«Кулың сузма!» дигән йиргә адәм кулы сузылгандыр.

Һаваи [6] нәфсенә алданды инсан һәм хатыннарга,
Хатыннарның сүзи берлән аталары хур булгандыр.
Безем тәгъбирчә бу көндә тәмәдденле [7] дигән йирләр
Бөтен инсаннари мөһлик [8] зарарлар берлә тулгандыр.
(1907)

[1] Татбикъ итеп – яраклаштырып.
[2] Җидаль – гауга, низаг.
[3] Ихтиляль – фетнә.
[4] Кател итеп – үтереп.
[5] Шу – шул.
[6] Һаваи – буш.
[7] Тәмәдденле – культуралашкан, мәдәниятле.
[8] Инсаннари мөһлик – инсаннарны һәлак итә торган.

Мәҗит Гафури (1880-1934) – шагыйрь, язучы, публицист, татар һәм башкорт әдәбиятлары классигы.

#мәҗит гафури әсәрләре #мәҗит гафури #маджит гафури

Сәхифәләр

Мәҗит Гафури. ***(«Үзенең гаклына татбикъ итеп диннәрне һәр милләт...»)