Татар әдәбияты 5 май 2023 00:09

Мәҗит Гафури. ***(«Сәгадәткә ирешмәк...»)

Скопировать ссылку

***
Сәгадәткә ирешмәк әс-
бабын күрмәк йөгермәкләр,
Тәрәкъкый тоткасын тоткан
Безем әрбаб һиммәттә.

Татар намен ишеткәндә
Җаһәләт исләрә төште,
Татардан таҗ төшәр искә,
Косур [1] улмазса хезмәттә.

Бөтен милләт хәлен баксак,
Бер инсан хәленә охшар.
Бер инсанның җәмигъ [2] гомере
Үтәрме наз-нигъмәттә?

Гасырларча хөкем сөргән
Җиһангир без татарлардыр –
Булып гайриләрә [3] гыйбрәт
Газимәт илә гайрәттә [4].

Бу әхваль алмашынды, гаксе [5]
килде, эш начарланды;
У гайрәт китте, нур бетте,
Татарлар калды зилләттә [6].
(1907)

[1] Косур – кимчелек, җитешсезлек.
[2] Җәмигъ – бөтен.
[3] Гайриләрә – башкаларга.
[4] Газимәт илә гайрәттә – уйлап эш итүдә, кыюлыкта (тырышлыкта).
[5] Гаксе – киресе.
[6] Зилләттә – түбәнлектә, хурлыкта.

Мәҗит Гафури (1880-1934) – шагыйрь, язучы, публицист, татар һәм башкорт әдәбиятлары классигы.

#мәҗит гафури әсәрләре #мәҗит гафури #маджит гафури

Сәхифәләр

Мәҗит Гафури. ***(«Сәгадәткә ирешмәк...»)