Мәҗит Гафури. ***(«Милләтем улганга татар...»)

Скопировать ссылку

***
Милләтем улганга татар, бән дә улдым бер татар;
Бергә булгач асыл җенсем, бергә булсын аһы-зар.

Алга китсә, бергә киттем, ташламам бән бунларый,
Милләтем алга китәр дип, хөсне зан [1] бунлара бар.

Асты-өскә кыйлды анлар дөньяның үткән заман,
Шунларә мәнсүб [2] татармын дип кыйлырмын ифтихар [3].
(1907)

[1] Хөсне зан – яхшы уй.
[2] Шунларә мәнсүб – шулар арасындагы (шуларга караган).
[3] Кыйлырмын ифтихар – мактанырмын, горурланырмын.

Мәҗит Гафури (1880-1934) – шагыйрь, язучы, публицист, татар һәм башкорт әдәбиятлары классигы.