Татар әдәбияты 5 май 2023 00:04

Мәҗит Гафури. Мәкъсуд

Скопировать ссылку

Бик җиңел юл белән мин мәкъсудым* тапмак булам,
Бу юлымда булса манигъ** – бер тараф атмак булам.
Мәкъсуда*** җитмәк җиңел түгел, имеш, бу дөньяда,
Инде мәкъсудым өчен агулары татмак булам.

Мин халыкны «гаклы юк» дип шелтә кыйлмак эстәсәм,
Мин алар кашында**** алардан да күп ахмак булам.
Тәртибе юк бу китешнең – инкяр итмәс һич кеше,
Дөньяның бу хәлләрен күргәч, үзем асмак булам.

Жаныма тәэсир итеп күп төрле хәлләр килмәге,*****
Баш алып, бу җирдә тормый, бер тараф качмак булам.
Шунда да куймас качуга милләтем берлән ватан,
Бервакыт яхшы булыр дип, күңлеме ачмак булам.

Бер кеше наз-нигъмәт эчрә,****** бер кеше тапмый тәгам!*******
Һәрбере булсын тигез дип, ачуларым басмак булам.
Бер көндә бер сәгать шатлык күрү насыйп түгел,
Кальбемең******** янган утына күз яшем чәчмәк булам.
(1907)

*Мәкъсуд – омтылыш, теләк.
**Манигъ – тоткарлык, киртә.
***Мәкъсудә – мәкъсудка.
****Кашында – каршында.
*****Килмәге – килә.
******Наз-нигъмәт эчрә – мул-рәхәт тормыш эчендә.
*******Тәгам – ризык.
********Кальбемең – күңелемнең.

Мәҗит Гафури (1880-1934) – шагыйрь, язучы, публицист, татар һәм башкорт әдәбиятлары классигы.

#мәҗит гафури әсәрләре #мәҗит гафури #маджит гафури

Сәхифәләр

Мәҗит Гафури. Мәкъсуд