Авыл 18 ноябрь 2018 08:26

Мөслим районында үзара салым буенча референдумда утыз сайлау участогы эшли

Мөслимдә үзара салым акчасы берничә ел рәттән 1000 сум күләмендә җыела.

Скопировать ссылку

(Мөслим, 18 ноябрь, "Татар-информ", "Мөслим", Римма Афзалова). Мөслим районында бүген 30 сайлау участогы эшләячәк. Шуларның бишесе район үзәгендә урашкан. Сайлау участоклары иртәнге 7.00 сәгатьтә ачылды. Якшәмбе булуга карамастан иртән-иртүк халык активлык күрсәтә, диләр сайлау участокларында эшләүчеләр.

1985 нче санлы Бакча сайлау участогында 1290 сайлаучы теркәлгән. Иртәнге 8.00 сәгатькә шуларның сиксәннән артыгы тавыш бирергә өлгергән. Әлеге участокта 18 яше тулып, референдумда беренче тапкыр катнашучыларга бүләкләр дә әзерләнгән иде. Мөслимнең Бакча сайлау участогында референдумда катнашучыларны кайнар коймак һәм чәй белән дә сыйлыйлар.

Бүген референдум уңаеннан Мөслимдә ярминкә дә оештырылды. Ярминкәдә авыл хуҗалыгы продукциясе белән бергә күрше районнардан, шәһәрләрдән килгән эшмәкәрләр дә үз продукциясен тәкъдим итә. Ярминкә, бердән, бәйрәм төсе бирә, икенчедән, бу азык-төлек һәм башка кирәк-яракны очсызрак бәядән алу мөмкинлеген дә бирә, ди ярминкәдә катнашучылар.

Мөслимдә үзара салым акчасы берничә ел рәттән 1000 сум күләмендә җыела. Җыелган акча, дәүләт тарафыннан дүрт тапкыр арттырылып кайта һәм җирлекне төзекләндерү өчен тотыла. Узган елларда үзара салым хисабына авылларда юллар төзекләнде, су линияләре яңартылды, урамнарга яктырткычлар куелды, карт агачлар киселде. Үзара салым хисабына хәтта парклар ясаучы авыллар да бар.

#үзара салым #референдум

Сәхифәләр

Мөслим районында үзара салым буенча референдумда утыз сайлау участогы эшли