Татар дөньясы 30 март 2018 11:01

Мәскәү өлкәсе Орехово-Зуево татарлары "Иман нуры" газетасының 2нче саны чыккан

Яңа басма нәширләре ислам дине нигезләре, татар теле, татар халкының гореф-гадәтләре, каладагы татарлар тормышы белән таныштыруны максат итеп куйган.

Скопировать ссылку

(Казан, 30 март, "Татар-информ", Лилия Локманова). Мәскәү өлкәсендәге Орехово-Зуево шәһәрендә "Иман нуры" дип исемләнгән газета чыга башлаган. Газетаның инде икенче - апрель саны белән дә танышырга мөмкин. Бу хакта шәһәрнең Татар-ислам мәдәни үзәге хәбәр итә.

Басма үзе рус телендә. Ул айга бер тапкыр бастырыла. "Иман нуры"нда, исеменнән үк күренгәнчә, дин һәм ислам нигезләренә басым ясала. Шулай ук татар халкының гореф-гадәтләре, йолалары, Орехово-Зуевада яшәүче татарлар тормышы хакында мәгълүматлар табарга, яңалыклар белән танышырга мөмкин.

Басманың бер бите тулысынча татар телен өйрәнүгә багышланган. Сәхифә татарча-русча сүзлек формасында эшләнелгән. Кыска гына (2-3 җөмләле) әңгәмәләр урнаштырылган. Сәхифә үзе "Татар теле" дип атала.

Орехово-Зуево татарлары активисты Дамир Булатов "Татар-информ" мәгълүмат агентлыгына белдергәнчә, киләчәктә газета битләрендә татар телендә вәгазьләр дә урын алачак.

Хатын-кыз һәм ислам темасы да газетада киң яктыртылган. Алар өчен махсус "Мөслимә"("Мусульманка") сәхифәсе эшләнелгән.

"Иман нуры"ның соңгы битендә исә татар халык милли ризыклары рецептлары урнаштырылган.

#иман нуры #орехово-зуево

Сәхифәләр

Мәскәү өлкәсе Орехово-Зуево татарлары "Иман нуры" газетасының 2нче саны чыккан