Сәясәт 1 июль 2005 12:08

Мәскәүдә Ульяновски өлкәсенең ике вәкиле дә - милләттәшләребез

Скопировать ссылку

(Ульяновски, 1 июль, “Татар-информ”, Ләйлә Исламова). Өлкәнең яңа губернаторы Сергей Морозов, ант кабул итеп, үз вазифаларына керешү тантанасында ук татар егете Шамил Идрисовны өлкәнең Россия хөкүмәте каршында үз вәкиле итеп билгеләгән иде. Ул бу вазифага шунда ук кереште. Ә менә Федерация Шурасына өлкә вәкиле итеп билгеләнгән Рөстәм Шияновны, Федерация Шурасы рәисе Сергей Миронов нигәдер кабул итәргә теләмәде. Имеш, Рөстәм Шиянов Ульяновскида түгел, Самарада яшәгән, ә вәкил булыр өчен җирле кеше кирәк. Мондый дәгъваны аңлау кыен, чөнки моңа кадәр генерал Шаманов җибәргән генерал Александр Калита да Ульяновскиныкы түгел иде, ләбаса.

Ниһаять, 4 айдан артык көткәннән соң, татар егете Рөстәм Шиянов Ульяновски өлкәсенең Федерация Шурасындагы вәкиле сыйфатында танылу тапты. Өлкәнең төп рәсми басмасы “Народная газета” моны Сергей Морозовның җиңүе дип белдерде.

Татар җәмәгатьчелеге фикеренчә, губернатор Сергей Морозов татар егетләренең ышанычлы булуына ышана.

Сәхифәләр

Мәскәүдә Ульяновски өлкәсенең ике вәкиле дә - милләттәшләребез