Мәдәният 25 июль 2018 20:18

Мәскәүдә Татарстан мәдәнияте көннәре узачак

Мәскәү халыкара музыка йортында мәдәният эшлеклеләренең гала-концерты узачак.

Скопировать ссылку

(Казан, 25 июль, “Татар-информ”). 15-17 августта Мәскәүдә Татарстан мәдәнияте көннәре узачак. Бу турыда Татарстанның Россиядәге Тулы вәкаләтле вәкиллеге матбугат хезмәте хәбәр итә.

15 августта “Библио-Глобус” китап кибетендә Андрей Ершовның “Архитектура и история Казани” һәм Михаил Черепановның “Герои Казани” китаплары презентациясе узачак. Чарада Татарстанның халык шагыйрьләре Равил Фәйзуллин, Ренат Харис, Роберт Миңнуллин һ.б. катнаша.

Мәскәү мәдәният үзәгендә Татарстан халык шагыйрьләре белән иҗади очрашу булачак. Анда Данил Салихов, Равил Фәйзуллин, Ренат Харис һәм Роберт Миңнуллин катнашачак.

16 августта җырчы Әлфия Авзалова истәлегенә багышланган концерт узачак. Анда Венера Ганиева, Хәмдүна Тимергалиева һәм Марсель Вәгыйзов, Алина Шәрипҗанова, Татарстан Җыр һәм бию ансамбле һ.б. чыгыш ясаячак. Концертны Татарстанның халык артисты Рәшит Сабиров алып барачак.

17 августта Данил мөселман зиратында танылган журналист Фәрит Сәйфелмөлековка һәйкәл ачылачак. Һәйкәлне Татарстан Республикасы урнаштыра. Шул ук көнне Габдулла Тукай һәйкәленә чәчәкләр салачаклар. Бу чарада Мәскәү мэры Сергей Собянин һәм Татарстан Президенты Рөстәм Миңнеханов катнашуы көтелә.

Мәскәү халыкара музыка йортында мәдәният эшлеклеләренең гала-концерты узачак. Камера оркестры озатуында Татарстанның атказанган һәм халык артистлары, Г.Камал исемендәге академия театры коллективы, Татарстан Дәүләт камера хоры һ.б. чыгыш ясаячак.

#Мәскәү #Татарстан

Сәхифәләр

Мәскәүдә Татарстан мәдәнияте көннәре узачак