"Мөнәҗәт" сүзе урынына "илаһи бәет" дип әйтү дөресрәк булыр иде – Геннадий Макаров
"Исламика" лекториендә Геннадий Макаровның “Татар традицияләрендә ислам фәлсәфи поэзиясе һәм музыкасы” дип аталган лекциясе булды.
(Казан, 18 май, «Татар-информ», Рузилә Мөхәммәтова). Борынгы музыкаль культура бездә мөнәҗәтләр буларак күзаллана. Әмма сәнгать фәннәре кандидаты, атказанган сәнгать эшлеклесе, фольклорчы галим Геннадий Макаров моны ашыгыбрак кереп киткән термин дип саный. Чынлыкта аның "илаһи бәет" дип аталуы дөресрәк була, ди Макаров. Ул - авылларда әбиләрнең "мөнәҗәт" сүзен кулланмавын искәртеп уза. “Халыкта "газәл", "касыйдә", "робагый" диләр. Мөнәҗәт - рухи поэтик мирасның бер жанры гына. Ә без бөтенесен мөнәҗәт дибез. Бу - тамырдан дөрес түгел. Элекке әдәбиятта "илаһи бәет" дип язылган. "Илаһи бәет" сүзе керсә, бөтен мөселман дөньясындагы сүзгә тәңгәлрәк килер иде”, - ди галим.
Сәнгать белгече, атказанган сәнгать эшлеклесе, фольклорчы галим Геннадий Макаровның “Татар традицияләрендә ислам фәлсәфи поэзиясе һәм музыкасы” дип аталган лекциясе Казан федераль университетының Ислам мәгарифен һәм исламиятне үстерү ресурс үзәгендә оешкан “Исламика” лекториендә үтте.