Мөхәммәтшин ОБСЕ Баш комиссарын кабул итәчәк һәм татарстанлыларны бүләкләячәк
Милли эшләр буенча баш комиссар Ламберто Заньер республика парламенты эшчәнлеге белән танышачак.
(Казан, 24 июль, “Татар-информ”). Бүген Татарстан Дәүләт Советы Рәисе Фәрит Мөхәммәтшин ОБСЕ Баш комиссары белән очраша, уңышка ирешкән татарстанлыларга дәүләт бүләкләре дә тапшырачак. Бу хакта “Татар-информ”га республика парламентының матбугат хезмәтендә хәбәр иттеләр.
“Татарстан Дәүләт Советы Рәисе Фәрит Мөхәммәтшин Европада Иминлек һәм хезмәттәшлек оешмасының милли азчылык эшләре буенча баш комиссары Ламберто Заньер белән эшлекле очрашу уздырачак. Шуннан соң ул комиссарны парламент эшчәнлеге белән таныштырачак”, - диделәр матбугат хезмәтендә.
Көннең икенче яртысында Фәрит Мөхәммәтшин Казан Кремлендә республика үсешенә өлеш керткән татарстанлыларга бүләкләр тапшырачак.
Бүләкләнеүчеләр исемлегендә 47 кеше. Алар арасында галимнәр, табиблар, авыл хезмәтчәннәре, артистлар, дәүләт эшчеләре, сәнәгать оешмаларында хезмәт куючылар бар. Дәүләт Советы Рәисе аларга Россиянең һәм Татарстанның дәүләт бүләкләрен, рәхмәт хатлары, грамоталар тапшырачак һәм мактаулы исемнәр бирелү турында игълан итәчәк.