Мөфти: Намаз уку бүлмәләре сәүдә үзәкләрендә эшләүчеләргә дә бик кирәк
Рәхмәт сүзләре дә, беренче чиратта, нәкъ менә сәүдә үзәкләре хезмәткәрләреннән килә, диде Камил хәзрәт Сәмигуллин.
(Казан, 8 декабрь, «Татар-информ», Гадел Әхмәтҗанов). Татарстан мөфтие Камил хәзрәт Сәмигуллин сәүдә үзәкләрендәге намаз уку бүлмәләренең шунда эшләүче хезмәткәрләргә дә кирәк булуын әйтте.
«Читтән килгән халыкка гына түгел, монда эшләүчеләр өчен дә бу бик мөһим. Былтыр башка урыннарда ачкач, безгә бик күп мөрәҗәгатьләр килде, рәхмәтләр укыдылар. Рәхмәт сүзләре күбрәк хезмәткәрләрдән килде», — диде ул «Татар-информ» хәбәрчесенә «Горки-Парк»та гыйбадәт кылу бүлмәсен ачканда.
Россия мөселман эшмәкәрләре ассоциациясе президенты Айдар Шаһимәрданов та шул ук фикердә.
«Без гел сәүдә үзәкләренә килүчеләр турында уйлыйбыз, ә бит андагы хезмәткәрләр дә бар. Аларның күбесе ачылган бүлмәләрдә намаз укый инде. Беренче чиратта, рәхмәт сүзләре дә нәкъ менә сәүдә үзәкләре хезмәткәрләреннән килә. Алар яхшы, чиста, матур шартларда намаз укуга мохтаҗ иде. Хәзер болар барысы да бар», — диде ул.