Дин 22 декабрь 2017 07:09

Мөфти Бакуда ислам бергәлеге конференциясендә катнашты

Бакудагы әлеге конференция Азербайҗанда игълан ителгән Ислам бергәлеге елына багышланган чаралар циклын йомгаклау булып тора.

Скопировать ссылку

(Казан, 22 декабрь, "Татар-информ"). Кичә Татарстан мөфтие Камил хәзрәт Сәмигуллин Бакуда “Ислам бергәлеге елы-2017: диннәр һәм мәдәниятләр арасында диалог” дип исемләнгән халыкара конференция эшендә катнашты. Бу хакта Диния нәзарәте матбугат хезмәте хәбәр итә.

Конференциягә дөньяның 40 иленнән танылган дәүләт, дин һәм фән әһелләре, 8 халыкара оешма җитәкчеләре һәм вәкилләре, төрле илләрнең дәүләт башлыкларының махсус вәкилләре, дини конфессия җитәкчеләре, хакимият, парламент һәм җәмәгатьчелек әгъзалары, дипломатик корпус вәкилләре килде. Россия делегациясе составында – Россиянең башка төбәк мөфтиләре, шул исәптән Мәскәү, Санкт-Петербург, Карачаево-Черкесия, Чечня, Башкортстан һ.б., шулай ук “Россия – Ислам дөньясы” стратегик күзаллау төркеме координаторы Вениамин Попов.

Конференцияне Азербайҗан Президенты Илһам Алиев ачты. Конференция кысаларында Камил хәзрәт Сәмигуллин дөньяның төрле илләрендә мөселман бергәлеген ныгыту темасына чыгыш ясады.

Бакудагы әлеге конференция Азербайҗанда игълан ителгән Ислам бергәлеге елына багышланган чаралар циклын йомгаклау булып тора. Шул исемдәге фәнни форумнар Иранда һәм Төркиядә узды. Шуларның берсендә Камил хәзрәт хәзерге геосәяси шартларда ислам бергәлегенең әһәмияте турында сөйләде һәм экстремизмга, хаклыкка туры килмәгән дингә каршы көрәштә һәм исламның чәчәк атуы өчен дөньяның барлык мөселманнарын берләшергә чакырды. “Ислам ул – кешеләрне гуманлыкка, тынычлыкка һәм иминлеккә чакыра торган дин”, – дип ассызыклый ул һәрбер конференциядә.

#Камил Сәмигуллин

Сәхифәләр

Мөфти Бакуда ислам бергәлеге конференциясендә катнашты