news_header_top_970_100
news_header_bot_970_100

Мәдрәсә шәкертләре арасында вәгазь сөйләү буенча ярыш узды

Әлеге чарада Татарстанның баш казые Җәлил хәзрәт Фазлыев та катнашты.

(Казан, 25 ноябрь, "Татар-информ"). Кичә Ислам динен кабул итүгә 1000 ел исемендәге Казан югары мөселман мәдрәсәсендә шәкертләр арасында вәгазь конкурсы узды. Бу хакта Татарстан Диния нәзарәте матбугат хезмәте хәбәр итә.

Әлеге чарада Татарстанның баш казые Җәлил хәзрәт Фазлыев, Татарстан мөселманнары Диния нәзарәтенең мәгариф һәм фән бүлеге мөдире Айдар хәзрәт Карибуллин, Бөтендөнья татар конгрессының Казан бүлеге җитәкчесе Фәрид Мифтахов, КФУ доценты, филология фәннәре кандидаты Илһам Фәттахов жюри буларак катнашучыларны бәяләделәр.

Мәдрәсә мөдире Ильяс хәзрәт Җиһаншин һәм уку йортының уку-укыту эшләре буенча мөдир урынбасары Аяз хәзрәт Мингалиев уку барышында татар телендә күркәм рәвештә сөйли белү сәләтен үстерүгә зур әһәмият бирелүен искәрттеләр.

Конкурс нәтиҗәләре буенча, иң оста вәгазьче буларак беренче курс шәкерте Илдар Ибраһимов танылды. “Иң сәнгатьле вәгазь сөйләүче” номинациясендә Илназ Мөхәммәтҗанов, Камил Мостафин билгеләнде. “Вәгазьне иң тырышып сөйләүче” номинациясендә Гайрат Гарифҗанов җиңде. Өлкән курс шәкерте Рушан Әхмәтҗанов үзен шулай ук яхшы вәгазьче буларак танытты.

news_right_column_1_240_400
news_right_column_2_240_400
news_bot_970_100