Мәчеттә намаз укылмау турында әйткәндә Мансур хәзрәт Җәләлетдиннең күзләре яшьләнде
Мәрҗани мәчете имам-хатыйбы намазны өйдә укуга күңеле белән каршы булуын әйтте.
(Казан, 20 март, «Татар-информ», Рәмис Латыйпов). Бүген җомга намазы вакытында Мәрҗани мәчете имам-хатыйбы Мансур хәзрәт Җәләлетдин коронавирус аркасында карантин кертелүе хакында әйткәндә берничә тапкыр күз яшьләрен сөртеп алды.
«Сез, мөселманнар, барыгыз да беләсез — Мәккә, Кәгъбәтулла ябылды. Мәккәдә барлык мәчетләр ябылды. Азан вакытында имамнар „намазны өйдә укыгыз“ дип әйтә. Безнең белән киләчәктә нәрсә буласын аңлатуы кыен… — диде имам һәм, күңеле тулып, туктап калды. Ул күз яшьләрен сөрткәннән соң сүзен дәвам итте. — Аллаһ Тәгалә безгә сынаулар җибәрдеме икән…»
Мансур хәзрәт җомга намазына килүчеләргә голәмәләр шурасының карарын җиткерде. Мәчетләр ябылмый, әмма җәмәгать белән намаз укылмый. Җомга намазының вакыты кыскара, ирләргә намаздан соң күрешү, кочаклашу тыела, укыганнан соң шунда ук мәчеттән чыгып китәргә кирәк булачак. Сәламәтлеге нык булмаганнарга намазга килү мәҗбүри түгел. Имам намазны өйдә укырга кирәклеген әйтте.
«Миңа бу хакта әйтү җиңел дип уйлыйсызмы? Авыр вакытта, авыру киләме, борчу-мәшәкатьме, безнең халык, киресенчә, мәчеткә бара. Кулларын күтәреп, Аллаһ Тәгаләгә ялвара. Без, киресенчә, мәчеткә килегез дип әйтергә тиеш. Ә без мәчеткә килмәгез, дибез. Аллаһ Тәгалә кичерсен инде», — диде ул.
Шул ук вакытта Мансур хәзрәт сәламәтлекнең Аллаһ Тәгаләдән амәнәт булуын һәм аны саклау мөселманның бурычы булуын искәртте. Имамнарның үз мәхәллә халкы сәламәтлеге өчен җаваплы булуын әйтте.
«Без мөселманнар, тәкъдиргә ышанабыз. Язмыштан узмыш юк. Аллаһ Тәгалә ничек кушкан, шулай булачак. Әмма Аллаһ сакланганны саклармын дигән. Үз-үзебезне сакламасак, безне кем саклар? Берегезнең дә чирләмәвен телим. Коткыга бирелмәгез», — дип үгетләде ул.